Jason Collinsek, 2013an, publikoki adierazi zuen homosexuala dela. Hala egin duen NBAko lehen jokalaria da. Orduko presidente Obamak txalotu egin zuen bere sexu-orientazioaren berri emateagatik, eta, 2014an, TIME 100: The Most Influential People in the World aldizkariaren azalean agertu zen. Urte hartan bertan utzi zuen saskibaloia, eta, gaur egun, LGBTQI+ komunitatearen aldeko aktibismoan aritzen da. Jasonen adierazpena urrats garrantzitsu bat izan zen bai kolektiboarentzat, bai aniztasunarentzat, oro har, kirolean, eta bereziki gizonezkoenean, ikusezin egin izan baitituzte normaltzat jotakoez bestelako desira-orientazioak. Egia da gero eta kirolari gehiagok hitz egiten dutela aho betean euren desira-orientazioari buruz, baina, NBAn, beste inork ez du egin Jasonek egindakoa.